Botterskorsie Gnocchi

Die Boesmanland is bekend vir sy Augustus winde. Dit waai dat die wêreld wasig om jou word- genoeg om enige huisvrou stapelgek te maak. Die stof lê sentimeters diep op jou vensterbanke (al het jy vanoggend oral afgestof), die wind fluit om die hoeke van die huis en jy waag dit nie om ‘n deur of venster oop te gooi om die bietjie namiddag son wat daar is in te nooi nie.

My menswees voel somber.

Met die koms van die naweek moes ek dus iets doen om die gemoedere te lig. Daar is iets nostalgies aan die Afrifranse Jantjie – ek het dit kliphard gespeel en ‘n oomblik van totale oorgawe ervaar. ‘n Oomblik waar ek vergeet het van die wind, van droogte, van Covid, van politiek. Ek het vergeet wie ek is en waarheen ek oppad is. En vir ‘n oomblik kon ek net WEES.

In hierdie oomblik van losbandigheid het ek toe sommer ook waaghalsig geraak en ‘n resep uitprobeer waarvan ek nog net op televisie gehoor het: Botterskorsie Gnocchi met ‘n Napolitaanse sous. Ek deel graag my aangepaste resep met julle.

Die geheime vir sagte, smelt-in-die-mond Gnocchi

• Moenie ekstra water byvoeg wanneer jy jou Botterskorsie sag kook nie. As jy ekstra water byvoeg gaan dit later te veel meel absorbeer en ‘n digte Gnocchi tot gevolg hê.
• Maak die Botterskorsie goed fyn en bewerk dit lekker met die vurk. Hoe meer lug jy ingewerk kry hoe sagter sal jou eindproduk wees.
• Wanneer jy die meel, eier en botterskorsie meng moet jy so min as moontlik roer. Hoe meer jy meng hoe meer gluten drade ontwikkel – hoe taaier is jou Gnocchi. Roer net totdat alles deurgemeng is.
• Werk vinnig wanneer jy die deeg werk en sny. Hoe vinniger die Gnocchi in kookwater gedompel en gaargemaak word hoe beter!

Botterskorsie Gnocchi met Napolitaanse Sous

Porsies

4

Porsies

Hierdie reseppie is uiters maklik! Maak net seker jy begin betyds sodat die Gnocchi mengsel vir ten minste 2 ure in die yskas kan rus voordat jy dit rol, sny en gaarmaak.

bestanddele

• Gnocchi

• 500g botterskorsie, geskil en in blokkies gesny

• 1 Ekstra groot eier, geklits

• 250ml Koekmeel, gesif

• 5 ml Sout

• Napolitaanse Sous

• 30ml Olyfolie

• 1 Bruin ui, fyn opgesny

• 2 Knoffelhuisies, gekneus

• 2 Blikkies (800g) Geblikte, gekapte tamaties met kruie

• 1 Rooi Chillie (Saadjies uitgehaal en fyngekap) – Optioneel

• 8 Vars Basiliekruid blare, fyngekap

• 30ml Tamatiepasta

• 15ml Suiker

• 60ml Water

• Sout en Varsgemaalde Swartpeper na smaak

Metode

• Plaas die botterskorsie blokkies in ‘n swaarboompot (sonder water) met ‘n deksel op. Verhit oor ‘n lae hitte en laat prut tot botterskorsie baie sag is.
  Nota – Jy kan botterskorsie rooster in ‘n Airfryer of sommer stoom in die Mikrogolf ook (Moet net geen ekstra water byvoeg nie)
• Laat koel die botterskorsie goed af en druk dit dan lekker fyn met ‘n vurk.
• Meng die botterskorsie, meel en geklitste eier met ‘n lepel – pasop vir te veel meng! Maak die deeg toe met kleefplastiek en plaas in die yskas vir ten minste 2 ure.
• Gaan voort met die maak van die Napolitaanse sous terwyl die gnocchi mengsel in die yskas verkoel.
• Verhit olyfolie oor matige hitte. Soteer die opgekapte ui en gekneusde knoffel tot goudbruin en deursigtig.
• Voeg die res van die bestanddele by en laat prut oor ‘n lae hitte tot gereduseer – ongeveer 25 tot 30 minute. Geur na smaak
• Na 2 ure kan die gnocchi deeg uit die yskas verwyder word. Plaas dit op ‘n meelbestrooide oppervlak en rol in ‘n dun lang wors van ongeveer 1,5cm dik.
  
• Sny die wors in stukkies van 1 cm en plaas “kussinkies” op ‘n meelbestrooide snyplank terwyl jy die res sny en vorm.
  
• Maak ‘n groot pot halfvol met water, voeg ‘n knippie sout by en laat dit kook.
• Gooi die gnocchi bietjies bietjies in die kookwater en kook tot gaar (Wanneer dit gaar is sal dit op die oppervlak dryf) Verwyder dan met ‘n gaatjieslepel en voeg gaar gnocchi by die Napolitaanse sous.
• Herhaal totdat alle gnocchi gaar is. Meng goed deur met die sous en laat sous en gnocchi saam prut oor ‘n lae hitte vir ongeveer 10 minute.
• Sprinkel Parmesaan oor en bedien warm!

Mag jy hierdie week uitbundigheid beleef. Mag jy vir ‘n oomblik die wêreld om jou stil maak en net luister met jou hart.

Met liefde uit die Boesmanland xxx