Hierdie week het ek met meer as een persoon die gesprek gehad oor “Wat as vandag jou laaste dag is?” ‘n Vraag wat al effens holrug gery is, maar wat my hierdie week anderster laat dink het.
Die idee van “leef elke dag asof dit jou laaste is” is nogal vir my ‘n uitpuntende gedagte!
Maar hoe anders sou ons lewe nie gewees het as ons geweet het wanneer dit jou laaste keer is nie? Hoe anders sou ek nie my ma gegroet het na ‘n lang week by die koshuis op 7 November 2008 as ek geweet het dis my laaste keer nie. Hoe anders sou ek nie daardie laaste 30 minute aangewend het nie? Hoe anders sal ek nie my man groet in die oggend as ek weet vandag is die dag wat die son oor een van ons lewens sak nie.
Hoe anders sal ek nie optree teenoor my hartsmense (en vreemdelinge) as ek weet daar gaan nie nog ‘n geleentheid wees nie? Dalk sal ek vriendeliker wees met die boemelaar langs die pad. Dalk sal ek minder tyd op my foon spandeer en meer tyd diep in iemand se oë kyk om hul hart te hoor. Dalk sal ek minder doen maar meer teenwoordig wees. Dalk sal ek stilbly eerder as om ‘n opinie te lewer wat ander se gevoelens seermaak.
Vanoggend kry ons die vraag “Wie het gesê jy is gewaarborg die dag van more? Dalk is vandag werklik jou laaste – wie sal weet?”
Een ding weet ek verseker – as vandag my laaste is sal ek pampoenkoekies met karamelsous eet vir al drie maaltye. Bedien met ‘n lekker Boesmanland skaapboud!
Pampoenkoekies
20
koekiesbestanddele
- Pampoenkoekies
500 ml Gaar pampoen
215 ml Koekmeel
10 ml Bakpoeier
2.5 ml Kaneel
1 Eier
Knypie sout
Sonneblomolie vir braai
- Karamel Sous
500 ml Melk
60 ml Goue stroop
125 ml Bruin Suiker
10 ml Mielieblom
5 ml Vanielje Geursel
1 ml Sout
Metode
- Pampoenkoekies
- Maak pampoen goed fyn
- Voeg res van die bestanddele by die pampoen en meng als goed deur
- Verhit olie in ‘n pan en braai eetlepels van beslag oor medium hitte (Braai eers aan die eenkant en draai dan om – albei kante moet mooi verbruin)
- Dreineer op kombuispapier
- Gooi karamelsousie oor warm koekies en bedien
- Karamel Sous
- Verhit melk, stroop, suiker en sout oor ‘n baie lae hitte totdat suiker opgelos is. Laat 10 minute saam kook tot sous effens begin verdonker
- Maak mielieblom aan met 10 ml koue water tot gladde pasta
- Gooi mielieblom pasta by sous terwyl jy aanhoudend roer. Laat sous prut tot effens verdik
- Verwyder van hitte en roer vanielje by
- Gooi warm oor die pampoenkoekies en bedien
Notes
- Hierdie koekies vries ook heerlik! Vries in ‘n lugdigte houer. Ontdooi stadig, verhit en gooi sous oor voordat jy dit bedien. Sous moet vars voorberei word, hou ongeveer 2 dae in die yskas
Ek sluit my cliché blog af met ‘n pragtige gedig van Hester Heese, wat mens nogal laat dink…
Jy mag maar jou koffie slurp of in die piering gooi
Jy mag maar met vuil voete oor die wit mat loop
Jy mag jou naels byt
vals sing
Die badkamer omkrap
swak groente huistoe bring
die nat vloer opdroog met my waslap
Skakel maar die radio aan om ses in die more en luister hoe hulle brabbel
oor veevrektes
aartappelroes
inseminasie
Jy mag maar snags hard snork
oor koue voete brom
As jy net terug wil kom….
Mag jy hierdie week liefhê, dien, omgee & luister asof dit jou laaste is.
Met liefde uit my Boesmanland kombuis xxxx
Nice
Hi Ja ek hoor heel dikwels ………aag ek het nog baie tyd. Ek leef net een dag op n slag. As gaan slaap in die aand is die plek in so n toestand dat sou ek nie more nog hier wees nie die volgende mense nie mismoedig hoef te wees nie om my “mess” te kom opruim nie Ek vra vir my self elke dag, as dit vandag jou laaste dag is wat sal jy wil doen, Ek soek God se aangesig en vra Hom wat wil U he moet ek vandag doen, Ek het nie een dag n ongelukkige of onvervulde dag nie. Ja eendag sal jy wakker word en dood wees Die woorde van iemand wat ons geken het en ja ons het hom Maandag begrawe.
Vir my ek is gereed Jesus gaan terug kom en in n oogwink sal almal uit die grafte opstaan en ons wat nog lewe sal verander 1 Kor 15 v 52 MAAR OM DAAROOR TE SIT EN TOP IS OM TOE TE LAAT DAT DIE VYAND VANDAG VAN JOU STEEL
Tannie Annapop
Kosbare kosbare lessie wat ek nou bevoorreg genoeg is om al op ‘n jong ouderdom by tannie te leer! Dankie vir die deel. Mag ek ook eendag op tannie se ouderdom opstaan en kan se ek het nie een dag ‘n ongelukkige / onvervulde dag nie!
Baie liefde vir tannie daar in die verre xxx